महाराष्ट्रात 'उद्धव राज' सुरू; शिवतीर्थावर 'महाशपथ' सोहळा

मुंबई: 'ठाकरे कुटुंबाचा बाळ या महाराष्ट्राला अर्पण करत आहे', असं प्रबोधनकारांनी ज्या शिवतीर्थावर जाहिर केलं... 'एक नेता, एक मैदान' असा इतिहास रचत प्रमुख बाळासाहेब ठाकरे यांची मुलुख मैदान तोफ ज्या शिवतीर्थावर अव्याहतपणे धडाडली... 'उद्धव आणि आदित्यला सांभाळा' अशी आयुष्याच्या संध्याकाळी ज्या शिवतीर्थावरून शिवसेनाप्रमुखांनी महाराष्ट्राला भावनिक साद घातली... ज्या शिवतीर्थावर महाराष्ट्राचे महानेते बाळासाहेब ठाकरे यांना अंतिम निरोप देण्यात आला... त्याच शिवतीर्थावर शिवसेना पक्षप्रमुख यांनी महाराष्ट्राचे २९वे मुख्यमंत्री म्हणून आज शपथ घेतली. राज्यपाल भगतसिंह कोश्यारी यांनी त्यांना पद आणि गोपनीयतेची शपथ दिली. हजारो लोकांच्या साक्षीने हा ऐतिहासिक सोहळा पार पडला. यावेळी राष्ट्रवादी काँग्रेसचे अध्यक्ष शरद पवार, काँग्रेसचे ज्येष्ठ नेते अहमद पटेल, कपिल सिब्बल, मल्लिकार्जुन खर्गे, अभिषेक मनु सिंघवी, मध्यप्रदेशचे मुख्यमंत्री कमलनाथ, राष्ट्रवादीचे नेते प्रफुल्ल पटेल, मनसेचे अध्यक्ष राज ठाकरे, द्रमुक नेते एम. स्टॅलिन, टी. आर. बालू, काळजीवाहू मुख्यमंत्री देवेंद्र फडणवीस, भाजपचे प्रदेशाध्यक्ष चंद्रकांत पाटील, उद्योगपती मुकेश अंबानी, निता अंबानी आदी मान्यवर उपस्थित होते. शिवसेना पक्षप्रमुख उद्धव ठाकरे यांनी बरोबर ६ वाजून ४५ मिनिटांनी मुख्यमंत्रिपदाची शपथ घेतली. राज्यपाल भगतसिंह कोश्यारी यांनी त्यांना पद आणि गोपनीयतेची शपथ दिली. छत्रपती शिवाजी महाराजांना वंदन करून, आई-वडिलांचं स्मरण करून आणि संविधानला स्मरून त्यांनी शपथ घेताच शिवतीर्थावर एकच जल्लोष करण्यात आला. उद्धव ठाकरे यांनी मुख्यमंत्रिपदाची शपथ घेतल्याने महाराष्ट्राला विधानसभेच्या निकालाच्या ३६ दिवसानंतर महाराष्ट्राला मुख्यमंत्री लाभला असून राज्यातील सत्तापेचालाही पूर्णविराम मिळाला आहे. उद्धव ठाकरे शपथविधीनंतर जनतेसमोर नतमस्तक झाले. उद्धव यांच्यानंतर शिवसेनेकडून शिवसेना विधीमंडळ गटनेते एकनाथ शिंदे, सुभाष देसाई, राष्ट्रवादीकडून जयंत पाटील, छगन भुजबळ, काँग्रेसकडून बाळासाहेब थोरात आणि नितीन राऊत यांनी शपथ घेतली. शपथविधी सोहळ्यानंतर व्यासपीठावरील सर्वच मान्यवरांनी उद्धव ठाकरे यांना प्रत्यक्ष भेटून त्यांचे हस्तांदोलन करत अभिनंदन केलं. शपथविधी सोहळा आटोपल्यानंतरही उद्धव ठाकरे जनसागरासमोर नतमस्तक झाले. शपथविधी सोहळ्यापूर्वी उद्धव ठाकरे यांचं मातोश्रीवर औक्षण करण्यात आलं. त्यानंतर बरोबर सायंकाळी सव्वा सहाच्या सुमारास सौ. रश्मी ठाकरे यांच्यासोबत घरातून बाहेर पडले. बरोबर ६ वाजून ३५ मिनिटांनी उद्धव ठाकरे शिवतीर्थावर पोहचले. उद्धव ठाकरे यांनी कपाळाला टिळा लावलेला होता आणि भगवा कुर्ता परिधान केला होता. पद आणि गोपनीयतेची शपथ घेण्यापूर्वी त्यांनी स्टेजवर छत्रपती शिवाजी महाराजांच्या पुतळ्याला अभिवादन केलं. स्टेजवर गुडघ्यावर बसून त्यांनी महाराष्ट्रातील जनतेला अभिवादन केलं. त्यानंतर शपथविधी सोहळा पार पडला. या सोहळ्याला राष्ट्रवादीच्या खासदार सुप्रिया सुळे, पीआरपीचे प्रा. जोगेंद्र कवाडे, शिवसेना नेते मनोहर जोशी, शिवसेना नेते संजय राऊत, सपा नेते अबु असीम आझमी, राजू शेट्टी, कपिल पाटील यांच्यासह महाराष्ट्र विकास आघाडीचे सर्व आमदार, शेतकरी, आत्महत्याग्रस्त शेतकरी कुटुंबाचे सदस्य आणि वारकरीही उपस्थित होते. जैन मुनींनीही स्टेजवर येऊन उद्धव ठाकरे यांना पुढील वाटचालीसाठी शुभेच्छा दिल्या.

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/37Kblfz
via IFTTT