'यशराज'विरोधात फसवणुकीचा गुन्हा दाखल

मुंबई: यशराज फिल्म कंपनीविरोधात १०० कोटींची फसवणूक केल्याप्रकरणी गुन्हा दाखल करण्यात आला आहे. मुंबई पोलिसांच्या आर्थिक गुन्हे शाखेने ही कारवाई केली आहे. इंडियन परफॉर्मिंग राइट्स सोसायटीने (आयपीआरएस) दाखल केलेल्या तक्रारीवर गुन्हा दाखल करण्यात आला. आयपीआरएस ही संस्था गीतकार, संगीतकार, गायक आणि संगीत निर्मात्यांचे प्रतिनिधीत्व करते. कंपनीच्यावतीने दूरसंचार कंपनी, रेडियो स्टेशन आणि संगीत स्ट्रीमिंग करणाऱ्या प्लॅटफॉर्मकडून रॉयल्टीची रक्कम देण्यात आली नाही. आयपीआरएस संस्थेला कलाकार आणि संगीत निर्मात्यांच्यावतीने रॉयल्टीची रक्कम जमा करण्याचे विशेष अधिकार आहे. मात्र, यशराज फिल्मस कंपनी ही रक्कम अनधिकृतपणे घेत असल्याची तक्रार दाखल करण्यात आली आहे. यशराज फिल्मस कंपनी आणि संचालकांनी आयपीआरएस संस्थेचे सदस्य असलेल्या कलाकारांची रॉयल्टीची रक्कम जमा करून सुमारे १०० कोटी रुपयांची कमाई केली असल्याची तक्रार दाखल केली आहे. यशराज फिल्मस कंपनीविरोधात भादंवि कलम ४०९ आणि कलम ३४ शिवाय कॉपीराइट कायद्यानुसार गुन्हा दाखल करण्यात आला आहे. एका अधिकाऱ्याने दिलेल्या माहितीनुसार, वायआरएफ कंपनी आणि त्याचे संचालक आदित्य चोप्रा व उदय चोप्रा यांचेही नाव एफआयआरमध्ये आहे. दरम्यान, या प्रकरणावर यशराज फिल्मस कंपनीच्यावतीने कोणतीही प्रतिक्रिया व्यक्त करण्यात आली नाही.