💁‍♂️ 'या' पिकअपने गावात पोहोचवला कोरोना

गुरुवारी दुपारी जेव्हा कोरोनाचे रिपोर्ट जिल्हावासियांना कळले, त्यावेळी प्रत्येकाच्या पायाखालची जमीनच हादरली होती. एकाच वेळी तब्बल 13 जण पॉझिटीव्ह आढळल्याने हा आकडा एकदम 30 वर जाऊन पोहोचला होता. 

नित्रूड या आठवडी बाजाराच्या गावात एकदम 11 जण मिळून आल्याने माजलगाव तालुकाही हादरून गेला होता. आता हे 13 जण नेमके कसे आणि कुठून आले याची एक साईड स्टोरी पुढे आली आहे.

प्राथमिक माहितीनुसार बीड जिल्ह्यातील 20 ते 22 जण खोपोलीहून 15 मे रोजी एक पिकअप भाड्याने घेऊन महारटाकळी या चेकपोस्टवरून बीड जिल्ह्यात दाखल झाले होते. रिक्षातील सर्वजण एकमेकांचे नातेवाईक होते. त्यांच्यातील काहीजण गेवराई तालुक्यातील तलवाडा परिसरातील नातेवाईकाकडे उतरले. 

गेवराईचे तालुका आरोग्य अधिकारी संजय कदम म्हणाले, तलवाड्यात उतरलेले सर्वजण मुळचे माजलगाव तालुक्यातील लवूळ येथील आहेत. मात्र लवूळ ग्रामस्थांनी त्यांना गावात येऊ नका असे सांगितल्याने ते तलवाड्यात नातेवाईकाच्या शेतात थांबले. आज त्यांचे स्वॅब घेतले जाणार होते. पुढे त्यातील काहीजण नित्रूडमध्ये तर काहीजण तेलगाव आणि काही कुंडी येथे गेले. 

नित्रूड ग्रामस्थांनी दिलेल्या माहितीनुसार त्यात एक नित्रूड माहेर असलेली आणि कुंडी सासर असलेली मुलगी होती. मात्र त्या मुलीला माहेरात थांबू नका म्हणून सांगण्यात आले. त्यानुसार ती मुलगी, तीचा पती व मुले असे सर्वजण कुंडीकडे निघून गेले. मात्र हे कुटुंब तेलगावमधूनच दुसर्‍या एका रिक्षाने नित्रुडमध्ये परत आले. 

त्यानंतर ही मुलगी तिचा पती व मुलं, आई-वडील असे सर्व जण नित्रुडच्या शाळेत थांबले. आरोग्य प्रशासनाला याची माहिती मिळाल्यानंतर ते नित्रूड येथे येऊन धडकले. त्यांनी नित्रूड, कुंडी येथे थांबलेल्यांना तत्काळ माजलगावच्या आरोग्य केंद्रात दाखल केले. आरोग्य प्रशासनाने यांचे स्वॅब तपासणीसाठी नेले असता त्यातील 13 जण पॉझिटीव्ह आढळून आले. त्यातील नित्रूडमधील 7 व कुंडी येथील 5 जण होते. शिवाय 1 सुर्डी येथील व्यक्तीचा अहवालही पॉझिटीव्ह आला आहे.