७० हजार खुर्च्या, २० LED, शिवतिर्थावर जय्यत तयारी

मुंबई : शिवसेना पक्षप्रमुख गुरुवारी सायंकाळी मुख्यमंत्रिपदाची शपथ घेतील. हा शपथविधी सोहळा ऐतिहासिक बनवण्यासाठी शिवाजी पार्क म्हणजेच शिवतिर्थावर जय्यत तयारी सुरू आहे. देशभरातील अनेक महत्त्वाच्या नेत्यांना या शपथविधीसाठी बोलावलं जाणार असल्याची माहिती आहे. शिवाजी पार्कात तब्बल ७० हजार खुर्च्यांची व्यवस्था करण्यात येत आहे. तर एका मोठ्या व्यासपीठावर प्रमुख पाहुण्यांसाठी खुर्च्या लावण्यात येत आहेत. मनसे अध्यक्ष राज ठाकरे यांनी शपथविधीला यावं यासाठीही प्रयत्न केले जात असल्याची माहिती आहे. कुणाकुणाला निमंत्रण मिळू शकतं ? राज ठाकरे, मनसे ममता बॅनर्जी, मुख्यमंत्री, पश्चिम बंगाल अरविंद केजरीवाल, मुख्यमंत्री, दिल्ली चंद्रबाबू नायडू, टीडीपी अशोक गहलोत, मुख्यमंत्री, राजस्थान अखिलेश यादव, माजी मुख्यमंत्री, उत्तर प्रदेश एचडी देवेगौडा, माजी पंतप्रधान राष्ट्रवादी काँग्रेसचे अध्यक्ष शरद पवार पाहुण्यांची यादी निश्चित करत असल्याची माहिती आहे. शपथविधीसाठी अत्यंत कमी वेळ बाकी आहे. पाहुण्यांना लवकरात लवकर मुंबईला येता यावं यासाठी ही यादी बनवण्याचं काम वेगाने सुरू आहे. मोदी -शाहांनाही निमंत्रण मिळणार? शपथविधीसाठी पंतप्रधान नरेंद्र मोदी आणि केंद्रीय गृहमंत्री अमित शाह यांनाही निमंत्रण दिलं जाणार असल्याचं शिवसेना खासदार संजय राऊत म्हणाले होते. मात्र खरंच निमंत्रण दिलं जाणार आहे का हे अजून अधिकृतपणे स्पष्ट झालेलं नाही. शपथविधीची वेळ आणि स्थळ गुरुवारी सायंकाळी ६.४० वाजता उद्धव ठाकरे मुख्यमंत्रिपदाची शपथ घेतील. मुंबईतील शिवाजी पार्कवर हा सोहळा होईल. शिवसेनेसाठी शिवाजी पार्कचं मोठं महत्त्व आहे. उद्धव ठाकरेंसोबत इतर मंत्रीही शपथ घेण्याची शक्यता आहे. शिवाजी पार्कवर जाऊन मुंबई महापालिका आयुक्त आणि वरिष्ठ पोलीस अधिकाऱ्यांनी पाहणी केली. जवळपास ७० हजार खुर्च्यांची व्यवस्था केली जाणार आहे. याशिवाय ६ हजार चौरस फुटाचं व्यासपीठ तयार केलं जात आहे, ज्यावर १०० खुर्च्या असतील. २० एलईडी लावल्या जाणार असल्याचंही सांगितलं जात आहे, जेणेकरुन प्रत्येकाला शिवाजी पार्कात येण्याची गरज पडणार नाही. शिवाजी पार्कात छत्रपती शिवाजी महाराजांच्या पुतळ्यासमोरच हे व्यासपीठ तयार केलं जात आहे. याच जागेवर दरवर्षी शिवसेनेचा ऐतिहासिक दसरा मेळावाही होत असतो.