मुख्यमंत्री उद्धव ठाकरे उद्या बीआयटी चाळीत

मुंबई: मुख्यमंत्री उद्या सकाळी परळच्या बीआयटी चाळीत जाऊन या चाळींची पाहणी करणार आहे. आजवरच्या कोणत्याही मुख्यमंत्र्यांनी बीआयटी चाळींची पाहणी केली नव्हती. त्यामुळे उद्धव ठाकरे यांच्या या भेटीकडे सर्वांचं लक्ष लागलं आहे. बीआयटी चाळीत भारतरत्न डॉ. बाबासाहेब आंबेडकर यांनी वास्तव्य केलं होतं, बाबासाहेब ज्या खोलीत राहिले होते, त्या रुमलाही मुख्यमंत्री भेट देण्याची शक्यता वर्तवण्यात येत आहे. मुख्यमंत्री उद्धव ठाकरे उद्या सकाळी साडेसात वाजता परळच्या बीआयटी चाळींमध्ये जाणार आहेत. बीआयटी चाळी जर्जर झाल्या असून त्यांच्या पुनर्विकासाचा प्रश्न ऐरणीवर आलेला आहे. यापार्श्वभूमीवर बीआयटी चाळीत जाऊन तिथल्या रहिवाशांशी ते संवाद साधणार आहेत. मुख्यमंत्री ठाकरे चाळकऱ्यांच्या समस्या जाणून घेणार असल्याने त्याकडे सर्वांचं लक्ष लागलं आहे. परळच्या दामोदर नाट्यगृहाजवळ या चाळी आहे. बीआयटी चाळीत एका माळ्यावर २० खोल्या आहेत. अशा तीन मजल्यांच्या ६ इमारतींमध्ये ४८०० खोल्या आहेत. अत्यंत जुन्या इमारती असल्याने पावसाळ्यात येथील रहिवाशांची प्रचंड तारांबळ उडते. भारतरत्न डॉ. बाबासाहेब आंबेडकर याच बीआयटी चाळीत राह्यचे. उद्या आंबेडकरांचा महापरिनिर्वाण दिन असल्याने मुख्यमंत्री ठाकरे आंबेडकर वास्तव्य करत असलेल्या रुमलाही भेट देण्याची शक्यता आहे. दरम्यान, ज्या बीआयटी चाळीत बाबासाहेब आंबेडकर २२ वर्ष राहिले, त्या बीआयटी चाळीचं स्मारकात रुपांतर करावं, अशी मागणी राष्ट्रवादीचे आमदार जितेंद्र आव्हाड यांनी केली आहे. बीआयटी चाळींची पाहणी केल्यानंतर मुख्यमंत्री थेट चैत्यभूमीला येणार असून बाबासाहेबांना अभिवादन करणार आहेत. त्यानंतर ते पुण्यासाठी रवाना होणार आहेत. उद्या पंतप्रधान नरेंद्र मोदी यांचं पुण्यात आगमन होणार आहे. प्रोटोकॉलनुसार त्यांचं स्वागत करण्यासाठी मुख्यमंत्री पुण्यात जातील. युती तुटल्यानंतर मोदी-ठाकरे पहिल्यांदाच भेटणार असून या दोघांच्या भेटीकडे संपूर्ण देशाचं लक्ष लागलं आहे.

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/2Rp3lv0
via IFTTT