पीएमसी बँक राज्य सहकारी बँकेत विलीन करण्याचा प्रस्ताव

मुंबई: पंजाब अँड महाराष्ट्र सहकारी बँक (पीएमसी) महाराष्ट्र राज्य सहकारी बँकेत (एमएमसी) विलीन करण्याचा प्रस्ताव देण्यात आला आहे, अशी माहिती राज्याचे माजी अर्थमंत्री व ठाकरे सरकारमधील विद्यमान मंत्री जयंत पाटील यांनी आज दिली. पीएमसी बँकेतील ४ हजार ३५५ कोटींचा घोटाळा उघड झाल्यानंतर आर्थिक कात्रीत सापडलेल्या या बँकेचे सामान्य खातेधारक हवालदील झाले आहेत. या खातेधारकांना न्याय देण्यासाठी या बँकेचे राज्य सहकारी बँकेत विलीनीकरण व्हावे, हा आमचा प्रयत्न असल्याचे जयंत पाटील म्हणाले. गरज भासल्यास या विलीनीकरणाबाबत रिझर्व्ह बँकेशीही आम्ही चर्चा करणार आहोत, असे पाटील यांनी स्पष्ट केले. पीएमसी बँकेच्या खातेधारकांना दिलासा मिळावा म्हणून नव्या सरकारने वेगाने पावले टाकायला सुरुवात केली आहेत. याबाबत जयंत पाटील यांनी तपशीलवार माहिती दिली. 'राज्य सहकारी बँकेच्या अध्यक्षांशी याबाबत मंगळवारी माझं बोलणं झालं. पीएमसी बँकेच्या विलीनीकरणावर माझी व त्यांची चर्चा झाली. पीएमसी बँकेच्या हजारो खातेधारकांना दिलासा देण्यासाठी हे पाऊल तातडीने उचलण्याची आवश्यकता असल्याचे मी त्यांना सांगितले', असे जयंत पाटील यांनी नमूद केले. वाचा: 'पीएमसी बँकेचे ग्राहक चिंताग्रस्त आहेत. आपली आयुष्याची कमाई बुडेल, अशी भीती त्यांना वाटत आहे. त्यामुळेच राज्य सरकार तुमच्या पाठिशी आहे, हा विश्वास त्यांना देण्याची गरज असून तोच प्रयत्न आम्ही करत आहोत. दोन्ही बँकांचे विलीनीकरण झाल्यास छोट्या खातेधारकांना नक्कीच मोठा दिलासा मिळेल', असे मतही पाटील यांनी व्यक्त केले. वाचा: दरम्यान, पीएमसी बँकेतील ४ हजार ३५५ कोटींचा कर्जघोटाळा उघड झाल्यानंतर रिझर्व्ह बँकेने कठोर पाऊल उचलत या बँकेवर आर्थिक निर्बंध लादले आहेत. या बँकेचा कारभार प्रशासकाच्या हाती देण्यात आला आहे. त्याचवेळी बँकेतून पैसे काढण्यासाठी मर्यादा ठरवण्यात आली आहे. सुरुवातीला खातेधारकांना खात्यातून केवळ १ हजार रुपये काढण्याचीच मुभा देण्यात आली होती. त्यानंतर टप्प्याटप्प्याने त्यात वाढ करून ही रक्कम आता ५० हजार रुपये इतकी करण्यात आली आहे. मात्र, त्यानंतरही सामान्य खातेधारकांची परवड थांबलेली नाही. अनेक खातेधारकांनी आपली आयुष्याची कमाई या बँकेत ठेवली आहे. असे खातेधारक सध्या प्रचंड तणावाखाली आहेत. याच तणावातून आतापर्यंत बँकेच्या ८ खातेधारकांचा मृत्यू झाला आहे. वाचा:

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/2DPrmmM
via IFTTT