सुश्रुषात ६ नवे बाधित; 'रुपारेल'मध्ये क्वॉरंटाइन - 3 new interruptions in the beginning; Quarantine in 'Ruparel'

मुंबई: दादर येथील सुश्रुषा रुग्णालयातील दोन नर्सला करोनाची लागण झाल्याचं उघड झालेलं असतानाच सुश्रुषा रुग्णालयातील आणखी चार नर्स आणि दोन डॉक्टरला लागण झाल्याचं उघडकीस आलं आहे. त्यामुळे सुश्रुषामधील रुग्णांची संख्या आठवर गेली आहे. तर क्वॉरंटाइन सेंटर सुविधा नसल्याने सुश्रुषातील डॉक्टर आणि कर्मचाऱ्यांना रुपारेल महाविद्यालयाच्या वसतिगृहात हलविण्यात आलं आहे. सुश्रुषामध्ये दोन नर्सला करोनाची लागण झाल्याचं आढळून आल्यानंतर पालिकेच्या वैद्यकीय पथकाने या रुग्णालयात धाव घेऊन तपासणी केली असता येथील आणखी चार नर्स आणि दोन डॉक्टरांना करोनाची लागण झाल्याचं आढळून आलं. त्यामुळे या हॉस्पिटलमधील संपूर्ण कर्मचाऱ्यांना क्वॉरंटाइन करण्यात आले. रुग्णालयातील १०० कर्मचाऱ्यांना धारावीतील राजीव गांधी स्पोर्ट्स कॉम्प्लेक्स येथे तर डॉक्टरांना माहीमच्या साई हॉस्पिटलमध्ये क्वॉरंटाइन करण्यात आले होते. मात्र राजीव गांधी स्पोर्ट्स कॉम्प्लेक्समध्ये कोणत्याही सोयी सुविधा नसल्याच्या तक्रारी येथील क्वॉरंटाइन कर्मचाऱ्यांनी केल्या होत्या. या क्वॉरंटाइन सेंटरमध्ये दोनच टॉयलेट आहे. एकच बाथरुम आहे. आम्ही सकाळपासून आंघोळ केली नाही. एकाच रुममध्ये २५ जणांना कोंडून ठेवलं आहे. येथे पाण्याचीही व्यवस्था नाही आणि सरकार सांगत सतत हात धुवून स्वच्छ करा. सॅनिटायझर नाही. साबणही नाही. आम्हाला बघायला एखादा कर्मचारीही नाही. उद्या आमच्या जीवाला काही झालं तर याची जबाबदारी कोण घेणार? असा सवाल क्वॉरंटाइन करण्यात आलेल्यांनी केला होता. तसेच अद्याप करोनाची चाचणीही करण्यात आली नसल्याची तक्रारही या कर्मचाऱ्यांनी केली होती. त्यामुळे या क्वॉरंटाइन सेंटरमधील नर्सेस आणि इतर कर्मचाऱ्यांना रुपारेल कॉलेजच्या वसतिगृहात ठेवण्यात आले आहे.

दरम्यान, सुश्रुषा रुग्णालयातील ज्या कर्मचाऱ्यांना करोनाची लागण झाली आहे. त्यांचीच चाचणी महापालिका करणार असून इतर कर्मचाऱ्यांनी स्वखर्चाने स्वत:ची चाचणी करून घ्यावी. जोपर्यंत हे कर्मचारी चाचणी करून घेत नाहीत, तोपर्यंत त्यांना रुपारेल महाविद्यालयाच्या वसतिगृहात क्वॉरंटाइन रहावं लागणार असल्याचं पालिकेच्य जी उत्तर विभागाचे सहाय्यक आयुक्तांनी स्पष्ट केलं आहे.