ठाणे: सेनेच्या महापौरांना राष्ट्रवादीच्या शुभेच्छा

ठाणे : ठाणे महापालिकेच्या महापौरपदी ज्येष्ठ नगरसेवक नरेश म्हस्के यांची तर उपमहापौरपदी पल्लवी पवन कदन यांची आज बिनविरोध निवड झाली. शिवसेना पक्षप्रमुख उद्धव ठाकरे, युवासेना प्रमुख आदित्य ठाकरे यांनी प्रत्यक्ष ठाणे महापालिकेत उपस्थित राहून नवनिर्वाचित महापौर व उपमहापौरांचे अभिनंदन केले व त्यांना शुभेच्छा दिल्या. विशेष म्हणजे महाराष्ट्रात शिवसेना, काँग्रेस आणि राष्ट्रवादी काँग्रेसची महाविकास आघाडी अस्तित्वात येत असताना राष्ट्रवादी काँग्रेसचे नेते जितेंद्र आव्हाड यांनीही शिवसेनेच्या या आनंदसोहळ्यात सहभागी होत नव्या मैत्रीपर्वाची गोड सुरुवात केली. ठाणे महापौरपदासाठी नरेश म्हस्के तर उपमहापौरपदासाठी पल्लवी कदम असा प्रत्येकी एकच अर्ज आला होता. त्यामुळे या दोन्ही पदांच्या निवडीची केवळ औपचारिकता उरली होती. ती औपचारिकता आज ठाणे पालिका सभागृहात पूर्ण झाली. ही बिनविरोध निवड पार पडल्यानंतर उद्धव ठाकरे व आदित्य ठाकरे यांच्या उपस्थितीत शिवसेनेने ठाणे महापालिका परिसरात जोरदार शक्तिप्रदर्शन केले. यावेळी शिवसेना नेते एकनाथ शिंदे यांच्यासह शिवसेनेचे सर्व पदाधिकारी उपस्थित होते. यावेळी राष्ट्रवादीचे नेते जितेंद्र आव्हाड यांनी आवर्जून उपस्थित राहत शिवसेनेच्या नव्या महापौरांना शुभेच्छा दिल्या. 'नरेश म्हस्के माझा जुना मित्र आहे. राजकारणापलीकडची आमची मैत्री आहे. एका सामान्य कुटुंबातील शिवसैनिकाला महापौरपदी विराजमान करून शिवसेना नेतृत्वाने जो आमच्या मित्राला न्याय दिला आहे, त्याचा मला निश्चितच आनंद वाटतो', अशा शब्दांत आव्हाड यांनी स्तुती केली. ठाणे महापौरपदाच्या निवडणुकीसाठी राष्ट्रवादी काँग्रेसकडूनही उमेदवार देण्यात येणार होता. मात्र, महाराष्ट्रात शिवसेना, राष्ट्रवादी काँग्रेस आणि काँग्रेस आघाडीची चर्चा अंतिम टप्प्यात आहे. अशावेळी राष्ट्रवादी काँग्रेसने शिवसेनेविरुद्ध उमेदवार देऊ नये, अशी अपेक्षा एकनाथ शिंदे यांनी व्यक्त केली होती. त्याला प्रतिसाद देत राष्ट्रवादीने या निवडणुकीतून माघार घेतली. त्यामुळेच ठाणे महापौरपदावर शिवसेनेचे नरेश म्हस्के बिनविरोध विराजमान झाले आहेत. दरम्यान, १३१ सदस्यसंख्या असलेल्या ठाणे महापालिकेत शिवसेनेचे ६७ नगरसेवक असून त्याखालोखाल ३४ नगरसेवकांचं बळ राष्ट्रवादीकडे आहे. भाजप- २३, काँग्रेस- ३, एमआयएम- २ आणि अपक्ष २ असं पक्षीय बलाबल आहे. संख्याबळ पाहता ठाणे पालिकेत शिवसेनेकडे स्पष्ट बहुमत आहे.