मी नाराज नाही; पण आज शपथ घेणार नाही: अजित पवार

मुंबई: 'राष्ट्रवादी काँग्रेसकडून आज फक्त छगन भुजबळ आणि जयंत पाटील यांचा शपथविधी होईल. मी आज शपथ घेणार नाही,' असं राष्ट्रवादी काँग्रेसचे नेते यांनी आज स्पष्ट केलं. त्यामुळं अजित पवार अजूनही नाराज असल्याची चर्चा सुरू झाली आहे. स्वपक्षाविरोधात बंड करून भाजपसोबत सरकार स्थापन करणाऱ्या व एकाकी पडल्यानंतर राजीनामा देऊन पुन्हा परतलेले अजित पवार यांची नाराजी अद्यापही कायम असल्याचं बोललं जातं. नव्या सरकारमध्ये राष्ट्रवादी काँग्रेसनं अडीच वर्षाचं मुख्यमंत्रीपद घ्यावं, असा त्यांचा सुरुवातीपासून आग्रह आहे. मात्र, उद्धव ठाकरे हे पूर्ण पाच वर्षे मुख्यमंत्री राहतील, असं तूर्त तरी ठरलं आहे. तर, राष्ट्रवादीला उपमुख्यमंत्रीपद व काँग्रेसला विधानसभा अध्यक्ष असं वाटप झालं आहे. असं असलं तरी अजित पवार अडीच वर्षांच्या फॉर्म्युल्यावर ठाम आहेत. याच अनुषंगानं आज शरद पवार यांच्या 'सिल्व्हर ओक' निवासस्थानी राष्ट्रवादीच्या नेत्यांची बैठक झाली. त्या चर्चेनंतर अजित पवार स्वत: पत्रकारांशी बोलले. सुप्रियांना घेऊन शपथविधीला जाणार 'आज मुख्यमंत्र्यांसोबत शिवसेना, राष्ट्रवादी व काँग्रेसच्या प्रत्येकी दोन मंत्र्यांचा शपथविधी होणार आहे. त्यानंतर अध्यक्षांची निवड व विश्वासदर्शक ठरावानंतर पुढील खातेवाटप ठरेल, असं अजितदादांनी सांगितलं. राष्ट्रवादीला अडीच वर्षे मुख्यमंत्रीपद मिळावं अशी आपली मागणी आहे का, असं विचारलं असता, तो निर्णय पक्षांच्या अध्यक्षांचा असेल. त्यावरून मी नाराज वगैरे नाही. माझ्या चेहऱ्यावर तसं काही दिसतंय का? विनाकारण बातम्या देऊ नका,' असं ते म्हणाले. 'शपथविधीसाठी मी सायंकाळी चार वाजता शिवाजी पार्कवर जाणार आहे. सुप्रिया सुळेंना सोबत घेऊन जाणार आहे,' असं अजित पवार यांनी सांगितलं. दरम्यान, मुंबईतील ऐतिहासिक शिवाजी पार्क मैदानावर आज नव्या मुख्यमंत्र्यांचा शपथविधी होत आहे. या सोहळ्यासाठी जय्यत तयारी करण्यात आली असून शिवतीर्थावर भव्य व्यासपीठ उभारण्यात आलं आहे. सुप्रसिद्ध कला-दिग्दर्शक नितीन चंद्रकांत देसाई यांच्या मार्गदर्शनाखाली साकारण्यात आलेल्या या व्यासपीठाला किल्ल्याचं स्वरूप देण्यात आलंय. छत्रपती शिवाजी महाराजांची सिंहासनाधिष्ठित आणि अश्वारुढ प्रतिमा व्यासपीठाच्या मध्यवर्ती ठिकाणी असणार आहे. तसंच, स्वराज्याची 'शिवमुद्रा' व्यासपीठावर कोरण्यात आली आहे. संपूर्ण परिसरात चोख बंदोबस्त ठेवण्यात आला आहे.

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/37MuhdS
via IFTTT