मीटू: अनु मलिक इंडियन आयडॉलमधून बाहेर

मुंबई: प्रसिद्ध गायिका सोना महापात्राने लैंगिक शोषणाचे आरोप केल्यानंतर प्रसिद्ध संगीतकार अन्नू मलिकने 'इंडियन आयडॉल' या रियलिटी शोमधून बाहेर पडण्याचा निर्णय घेतला आहे. त्यामुळे मलिक 'इंडियन आयडॉल-११' सीजनमध्ये परीक्षक म्हणून दिसणार नाही. लैंगिक शोषणाचा आरोप असतानाही मलिकला परीक्षक म्हणून नियुक्त केल्याबदद्ल सोना महापात्राने या चॅनलला वारंवार सवाल केला होता. त्यानंतर मलिकने या शोमधून बाहेर पडण्याचा निर्णय घेतल्याचं सूत्रांनी सांगितलं. लैंगिक शोषणाविरोधातील मीटू चळवळ सुरू झाल्याने अनेक महिलांनी समोर येऊन त्यांच्यावरील लैंगिक अत्याचाराच्या घटना उघडक केल्या होत्या. विशेष म्हणजे बॉलिवूडमधील महिला कलाकारांनी लैंगिक शोषणाविरोधात सर्वाधिक आवाज उठविला होता. अनेक नावाजलेल्या अभिनेत्रींनी बॉलिवूडमधील पुरुषांचे त्यांना आलेले अनुभव विशद केले होते. काही बुजुर्ग अभिनेत्रींनीही त्यांच्या करिअरच्या सुरुवातीला आलेल्या अनुभवांना वृद्धापकाळातही वाट मोकळी करून दिली होती. अचानक उठलेल्या या मीटू वादळामुळे अनेक कलाकारांना सिनेमे आणि सीरियल्स सोडावे लागले होते. अनेकांना रिअॅलिटी शोमधूनही बाहेर पडावे लागले होते. सोना महापात्रानेही संगीतकार अनु मलिकचा पर्दाफाश केला होता. त्यामुळे त्याला इंडियन आयडॉलच्या १०व्या पर्वातून बाहेर पडावं लागलं होतं. मात्र इंडियन आयडॉलच्या ११ व्या पर्वात मलिकला परीक्षक म्हणून घेण्यात आले होते. त्याला सोनाने आक्षेप घेऊन सोनी टिव्हीला जाब विचारले होते. हे प्रकरण अधिक चिघळू लागल्याने अखेर त्याने या रिअॅलिटी शोमधून बाहेर पडण्याचा निर्णय घेतला आहे. सोना महापात्राने मलिकविरोधात आरोप केल्यानंतर सोशल मीडियातून तिला अनेकांनी पाठिंबा दिला होता. तिला अभिनेत्री तनुश्री दत्तानेही पाठिंबा दिला होता. त्यामुळे मलिकने चॅनेलशी चर्चा करून त्यांना हा शो सोडत असल्याचं सांगितलं. दरम्यान, चॅनेलने त्याला अद्याप दुजोरा दिला नाही.