CM उद्धव यांची आरे मेट्रो कारशेडला स्थगिती

मुंबई : मुख्यमंत्री यांनी पदभार स्वीकारताच मोठी घोषणा केली आहे. आरे कॉलनीत होणाऱ्या मेट्रो कारशेडच्या कामाला स्थगिती देण्यात आली आहे. याचं पुनर्परीक्षण केल्याशिवाय पुढील काम होणार नाही, असे निर्देश दिले असल्याची माहिती उद्धव ठाकरे यांनी दिली. कोणतीही विकासकामे रखडणार नाहीत, पण आपलं वैभव गमावून विकासकामे होणार नाहीत, असंही उद्धव ठाकरे यांनी स्पष्ट केलं. ही स्थगिती फक्त कारशेडच्या कामाला आहे. त्यामुळे मेट्रोचं काम सुरुच राहणार आहे. विधीमंडळ वार्ताहर कक्षात उद्धव ठाकरेंनी वार्तालाप केला. यावेळी सरकारची पुढची ध्येयधोरणं आणि दिशा त्यांनी स्पष्ट केली. ‘मुख्यमंत्री म्हणून अनपेक्षितपणे आलोय. हे तीन पक्षांचं सरकार आहे. विविध अडचणींचा सामना आम्हाला करायचाय. आतापर्यंत दोन ते तीन वेळाच मंत्रालयात आलोय. प्रथा, परंपरा माहित नसताना शिवधनुष्य उचललं आहे', असं उद्धव ठाकरे म्हणाले. शिवसेना यापूर्वीही सरकारमध्ये होती. त्यावर नेहमी टीका केली जायची. यावरही उद्धव ठाकरेंनी भूमिका सांगितली. ‘टीका करताना चुका कळायला हव्या, फक्त ओरबाडणे म्हणजे पत्रकारिता नव्हे. आम्ही सत्तेत होतो की नव्हतो ही भूमिका कुणालाच कळली नाही. घोषणांची अंमलबजावणी होते की नाही हे काम आम्ही केलं’, असं ते म्हणाले. ‘सचिवांसोबत ओळख झाली. हे आपल्या सर्वांचं सरकार आहे, जनतेशी नम्रपणाने वागणारं सरकार आहे. कराच्या रुपाने जो पैसा आपल्याकडे येतो, तो योग्य ठिकाणी वापरला पाहिजे, जनतेच्या पैशाची उधळपट्टी होणार नाही. सगळी कामं करण्यासाठी सर्वसामान्य जनतेच्या खिशातला पैसा आहे. मुंबईत जन्मलेला पहिला मुख्यमंत्री मी आहे. माझ्या मुंबईसाठी काय करायचंय त्याचाही विचार सुरु आहे. शेतकऱ्यांनाही दिलेला शब्द पाळायचा आहे. आरे कारशेडला स्थगिती दिलेली आहे. कोणतंच विकासकाम रखडणार नाही, पण आपल्या हाताने आपलं वैभव आपण गमावत असू तर तो विकास नाही. याचा पुनर्विचार होत नाही तोपर्यंत आरेचं काम होणार नाही,’ असं उद्धव ठाकरेंनी सांगितलं. ऐन निवडणुकीच्या काळात आरे कारशेडचा मुद्दा चांगलाच गाजला होता. कारशेडच्या कामासाठी रातोरात अडीच हजारच्या आसपास झाडे कापण्यात आली होती. यावर आमचं सरकार आल्यानंतर योग्य ती कारवाई केली जाईल, अशी प्रतिक्रिया उद्धव ठाकरे यांनी दिली होती. त्यानुसार त्यांनी पदभार स्वीकारताच आरेमधील कामाला स्थगिती दिली.

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/2DrhOyb
via IFTTT