मुंबई: पोपटांच्या तस्करीचा पर्दाफाश; एकास अटक

म. टा. प्रतिनिधी, ठाणे मुंबईतील गोरेगाव बस डेपो येथे पोपटाची अनधिकृत पिल्ले विक्रीसाठी आणण्यात येणार असल्याची माहिती 'वाईल्डलाइफ वेल्फेअर असोसिएशन'चे सदस्य आदित्य पाटील यांना मिळाली होती. त्यानुसार ठाणे वनविभागाच्या पथकाने या भागात शनिवार ३० नोव्हेंबर रोजी सापळा रचला. यावेळी सिध्देश मांजरे (२५) हा गोरेगाव येथे राहणारा तरूण पोपट पक्षी आणि चार पिलांस तेथे पोहचल्यानंतर वनविभागाने त्याला ताब्यात घेतले. मुंबईतील क्राफर्ड मार्केट येथून ही पिल्ले आणल्याचे त्यांने सांगितले. परंतु वनविभागाकडून अधिक तपासणी सुरू करण्यात आली आहे. वन्यजीव संरक्षणासाठी काम करणाऱ्या वाईल्डलाईफ वेल्फेअर असोसिएशन वन्यप्राणी आणि पक्षी तस्करी विरोधात सक्रीयपणे काम करत असून वेगवेगळ्या माध्यमातून या तस्करांची माहिती मिळवण्याचा प्रयत्न करत असते. त्यातूनच गोरेगाव परिसरात पोपटाची विक्री होत असल्याची माहिती त्यांना मिळाली होती. त्यानुसार ठाणे वन विभागाचे वन अधिकारी नरेंद्र मुठे यांनी वनपाल रवींद्र तवर, मनोज परदेशी आणि वन पथकासह गोरेगाव गाठले. त्यांच्यासोबत संस्थेचे रोहित मोहिते, ओमकार कोळेकर हे देखील होते. वाचा: गोरेगाव पूर्व बस डेपो येथे सापळा रचला असता सायंकाळी पाच वीसच्या सुमारास मांजरे हा तरूण पुठ्याच्या खोक्या सह तेथे पोहचला. त्याच्या जवळील पुठ्याच्या खोक्याची तपासणी केली असता त्यामध्ये पोपट पक्षाची चार पिल्ले सापडली. त्याच्याकडे या पिल्लाबाबत अधिक चौकशी केल्यानंतर त्यांनी हे पोपट पक्षांची पिल्ले क्रॉफर्ड मार्केट मुंबई येथून आणली असल्याचे सांगितले. त्याच्या घरातही तपासणी केल्यानंतर घरातून एक पोपट पक्षी ताब्यात घेण्यात आला. त्यावरून सिद्देश याच्यावर वन्य जीव संरक्षण अधिनियम १९७२ नुसार कारवाई करण्यात आली. त्याच्याकडून पंधरा हजारांचा दंड वसुल करण्यात आला आहे. त्यास बंधपत्रावर सोडण्यात आल्याची माहिती वनविभागाकडून देण्यात आली. पोपट पक्षाची पिल्ले क्रॉफर्ड मार्केट मुंबई येथून कोणाकडून घेतली व कोणास विक्री करणार होता याचा तपास वन अधिकारी नरेंद्र मुठे करीत आहेत. वाचा: