पुणे: पबजी आहारी गेलेल्या १६ वर्षांच्या मुलाची आत्महत्या

म. टा. प्रतिनिधी, बिबवेवाडी परिसरात एका सोळा वर्षांच्या मुलाने मोबाइलमध्ये व्हिडिओ रिकोर्डिंग करत गळफास घेऊन आत्महत्या केल्याचा धक्कादायक प्रकार समोर आला आहे. आजीनं व टिक टॉक व्हिडिओ पाहण्यास विरोध केल्यामुळे त्याने आत्महत्या केल्याचे स्थानिकाचे म्हणणे आहे. या प्रकरणी बिबवेवाडी पोलिस ठाण्यात आकस्मात मृत्यूची नोंद करण्यात आली आहे. पोलिसांनी दिलेल्या माहितीनुसार, आत्महत्या केलेला मुलगा त्याच्या आजीसोबत बिबवेवाडी परिसरात राहायचा. त्याला वडील नसून त्याची आई मुंबईत असते. त्या मुलास मोबाइलचे व्यसन लागले होते. त्यामुळे त्याने नववीनंतर शाळा देखील सोडली होती. तो सतत मोबाइलवर टिकटॉक व्हिडीओ व पबजी गेम खेळायचा.

हेही वाचा : अरोग्य विषयी

त्यामुळे त्याची आजी सतत काळजीत होती. मी गेल्यावर तुझे काय होणार असं त्याला बोलायची. तसंच, मोबाइल वापरू नको म्हणून त्याला रागवायची. त्यामुळं गेल्या आठ ते दहा दिवसांपासून तो मोबाइल जास्त वापरत नव्हता. सोमवारी सायंकाळी आजी एका खोलीत झोपली असताना त्याने दुसऱ्या खोलीत मोबाइलमध्ये व्हिडिओ रेकॉर्डिंग सुरू केले. साडीच्या सहाय्याने गळफास घेऊन आत्महत्या केली. आजी उठल्यानंतर हा सर्व प्रकार समोर आला. पोलिसांना घटनेची माहिती मिळाल्यानंतर त्यांनी धाव घेतली. त्यावेळी त्यांना मोबाइल दिसून आला. त्यामध्ये त्याने आत्महत्या केल्याचे रेकॉर्डिंग झाले होते. पबजी गेम व टिकटॉक व्हिडीओ पाहण्यावरून रागवल्यामुळे मुलाने आत्महत्या केली असल्याचे स्थानिकाचे म्हणणे आहे. पण, या प्रकरणी अधिक तपास सुरू असल्याचे बिबवेवाडी पोलिसांनी सांगितले.