चोरटे येताच मिळणार ‘सिग्नल’; पोलिस यंत्रणेशी कॅमेरे होणार लिंक

म. टा. प्रतिनिधी, नाशिक गुन्हेगारांना प्रतिबंध करण्यासह ग्राहक आणि व्यावसायिकांची सुरक्षिततेकरिता नाशिकच्या सराफ बाजारात ३६ कार्यान्वित करण्यात आले असून, हे कॅमेरे पोलिस कंट्रोल रूमशी लिंक केले जाणार आहेत. पोलिसांकडे असलेल्या संशयितांचा डेटा कॅमेऱ्याच्या सिस्टिमला जोडाला जाणार असल्याने, चोरटे सीसीटीव्हीच्या नजरेत येताच ‘पॉप-अप’ मेसेजचा सिग्नल दिसणार आहे. त्यामुळे संशयित गुन्हेगारांना प्रतिबंध करणे आता शक्य होणार आहे. नाशिक सराफ असोसिएशनतर्फे ऑक्टोबर महिन्यात रविवार कारंजा ते दहिपूल परिसरात सीसीटीव्ही बसविण्याचे ठरविण्यात आले. त्यानुसार शनिवारी (दि.७) सकाळी ११ वाजता ३६ कॅमेऱ्यांचे उद्घाटन पोलिस आयुक्त विश्वास नांगरे-पाटील यांच्या हस्ते सराफ बाजारातील असोसिएशनच्या हॉलमध्ये करण्यात आले. त्यावेळी पोलिस उपायुक्त अमोल तांबे, सहाय्यक आयुक्त प्रदीप जाधव, वरिष्ठ पोलिस निरीक्षक हेमंत सोमवंशी, असोसिएशनचे अध्यक्ष चेतन राजापुरकर, उपाध्यक्ष मेहूल थोरात, सचिव गिरीश नेवसे, राजेंद्र दिंडोरीकर, लाड सुवर्णकार समाजाचे अध्यक्ष सुनील महालकर यांच्यासह इतर पदाधिकारी उपस्थित होते. त्यावेळी बोलतांना पोलिस आयुक्त नांगरे-पाटील म्हणाले की, सराफ बाजाराने घेतलेला निर्णय अभिमानास्पद असून, सुरक्षितता, जबाबदारी आणि पारदर्शकता राखली जाणार आहे. गुन्हे घडण्यास प्रतिबंध होणार असून, गुन्हेगार कोणत्याही परिस्थितीत आता सुटू शकणार नाही. अशीच यंत्रणा विविध ठिकाणी कार्यान्वित झाल्यास गुन्ह्यांच्या तपासाला वेग येईल, असे ते म्हणाले. त्यावेळी सराफ व्यावसायिकांनी काही समस्या मांडत त्यावर तोडगा काढण्याची विनंती आयुक्तांकडे केली.

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/36cNTWK
via IFTTT