मुंबई: सूटकेसमधील मानवी अवयवांचे गूढ उकलले!

म. टा. खास प्रतिनिधी । माहीमच्या समुद्रकिनारी सुटकेसमध्ये सापडलेल्या मानवी अवयवांचे गूढ उकलले असून हे अवयव येथे राहणाऱ्या ६२ वर्षीय बॅनोटो यांचे असल्याचे स्प्ष्ट झाले आहे. बॅनोटो यांची हत्या संपत्तीच्या वादातून करण्यात आली असून गुन्हे शाखेने या प्रकरणी प्रेमी युगुलाला अटक केली आहे. मुंबई आणि मुंबई बाहेरील पंचतारांकित हॉटेलमध्ये म्युझिक शो करणारे बॅनोटो हे सांताक्रूझ पूर्व वाकोला मस्जिद येथे एकटेच राहत होते. काही वर्षांपूर्वी त्यांनी एका तरुणीला दत्तक घेतले होते. या तरुणीचे एका तरुणासोबत प्रेमप्रकरण सुरू होते. बॅनोटो यांची संपत्ती आपल्याला मिळावी म्हणून दत्तक घेतलेल्या तरुणीने आपल्या प्रियकराच्या मदतीने बॅनोटो यांची राहत्या घरातच हत्या केली. त्यानंतर बॅनोटो यांच्या शरीराचे तीन भागांत तुकडे करून ते भाग तीन वेगवेगळ्या सुटकेसमध्ये टाकून तिन्ही सुटकेस वाकोला येथून वाहत जाणाऱ्या मिठी नदीच्या पात्रात फेकून दिल्या. त्यातील एक सुटकेस माहीम पोलिसांना सोमवारी माहीम दर्ग्याच्या मागे असलेल्या समुद्रात मिळाली होती. त्यात एक हात, एक पाय आणि पुरुषाचे गुप्तांगांचा कापलेला भाग होता.

टेलर मार्कमुळे सुगावा माहीम दर्गा येथील समुद्र किनारी वाहत आलेल्या या सुटकेसमध्ये मानवी अवयवांसह एक शर्ट पॅन्टही मिळाले होते. शर्टच्या कॉलरवर 'अल्मो' टेलर हा मार्क होता. त्यावरून गुन्हे शाखा कक्ष ५ ने टेलरचा शोध घेतला असता कुर्ला पश्चिम येथील बेलग्रामी रोडवर अल्मो टेलरचे दुकान सापडले. गुन्हे शाखा कक्ष ५चे प्रभारी जगदीश साईल यांच्या मार्गदर्शनाखाली निरीक्षक योगेश चव्हाण, सहायक निरीक्षक महेंद्र पाटील आणि पथकाने तांत्रिक पुराव्यांवरून दोघांना ताब्यात घेतले. चौकशीत त्यांनी बॅनोटो यांच्या हत्येची कबुली दिली.

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/2LwHNsF
via IFTTT