मुंबई: केईएममध्ये नऊ वर्षाच्या मुलाचा मृत्यू

केईएम रुग्णालयात एका नऊ वर्षाच्या मुलाचा डॉक्टरांनी चुकीचे औषध दिल्यामुळे मृत्यू झाल्याचा आरोप कुटुंबियांनी केला आहे. प्रिन्स राजभर या चार महिन्याच्या बाळाचा केईएममधील सदोष मशिनमुळे मृत्यू ओढावल्याचे प्रकरण ताजे असतानाच, ही घटना समोर आली आहे.

केईएम रुग्णालयात दाखल झालेल्या या मुलाला दोन दिवसापूर्वी डिस्चार्ज देण्यात आला. घरी घ्याव्या लागणाऱ्या औषधांमध्ये एक गोळी मोठ्या आकाराची होती. ती गरम दुधातून घेण्याचा सल्ला देण्यात आला होता. तरीही गोळी घशात अडकून मुलाला अस्वस्थ वाटू लागले. उपचारासाठी रुग्णालयात आणताना त्याचा मृत्यू झाला. चुकीच्या औषधामुळे मृत्यू झाल्याचा आरोप पालकांनी केला आहे. याबाबत पालकांनी तक्रार अर्ज दिल्याचे वरळी पोलिसांनी सांगितले.

केईएम रुग्णालयाचे अधिष्ठाता डॉ. हेमंत देशमुख यांनी मुलाला मृतावस्थेत आणण्यात आल्याचे सांगितले. या मुलाचे शवविच्छेदन करण्यासाठी मृतदेह जेजे रुग्णालयात पाठवण्यात आला आहे, असेही ते म्हणाले.