लहान मुलांना कामावर ठेवू नकाः सयाजी शिंदे

म. टा. प्रतिनिधी, : अठरा वर्षांखालील लहान मुलांना कामावर ठेवू नका, असे आवाहन चित्रपट अभिनेते सयाजी शिंदे यांनी केले. बालकामगार प्रथेविरोधात जनजागृतीसाठी अतिरिक्त कामगार आयुक्तालयातर्फे राबविण्यात येणाऱ्या मोहिमेअंतर्गत 'सेल्फी' काढून सयाजी शिंदे यांनी या अनिष्ट प्रथेच्या निर्मूलनासाठीचा निर्धारही व्यक्त केला. बालकामगार प्रथेच्या समूळ उच्चाटनासाठी अतिरिक्त कामगार आयुक्तालयातर्फे ७ नोव्हेंबर ते ७ डिसेंबर या कालावधीत जागृती मोहीम राबविली जात आहे. त्यासाठी जनजागृती फेरी, स्वाक्षरी मोहीम, हमीपत्रे, शपथ, फलक प्रदर्शनांचे आयोजन केले जात आहे. या मोहिमेचा भाग म्हणून आयुक्तालयाने शहरातील विविध मॉलमध्ये प्रबोधनपर ‘सेल्फी कटआऊट्स’ लावण्याचा अभिनव उपक्रम राबविला. बालकामगार कामावर ठेवणे हा कायद्याने गुन्हा असून, त्याची जाणीव या कटआऊट्सद्वारे करून दिली जात आहे, तसेच हा सामाजिक गुन्हा थांबविण्याचे आवाहनही केले जात आहे. अभिनेते सयाजी शिंदे यांनीही या मोहिमेत योगदान देत 'अठरा वर्षांखालील लहान मुलांना कामावर ठेवू नका,' असे भावनिक आवाहन केले, तसेच गरज भासल्यास या मोहिमेत सक्रिय सहभागी होण्याची ग्वाहीदेखील दिली. या वेळी पुणे विभागाचे अतिरिक्त कामगार आयुक्त शैलेंद्र पोळ, कामगार उप आयुक्त विकास पनवेलकर, सर्व सहायक कामगार आयुक्त उपस्थित होते.

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/34Y7fic
via IFTTT