तर वेगळा निर्णय घ्यावा लागेल; खडसेंचा इशारा

जळगाव: मी पक्ष सोडणार नाही. पण मी काही देव नाही. पक्षातील नेते मला टार्गेट करत राहिले आणि माझ्यावर अन्याय, अत्याचार सुरूच राहिल्यास मला वेगळा निर्णय घ्यावा लागेल. पक्षाला सांगूनच निर्णय घेईल, असा इशारा भाजपचे ज्येष्ठ नेते यांनी आज दिला. खडसे यांच्या या विधानामुळे त्यांचे बंड अजूनही शमले नसल्याचं बोललं जात आहे. आज भाजपची जळगाव निहाय कार्यकर्त्यांची बैठक पार पडली. या बैठकीनंतर भाजपचे प्रदेशाध्यक्ष चंद्रकांत पाटील यांच्याशी चर्चा करताना एकनाथ खडसे यांनी ही प्रतिक्रिया व्यक्त केली. मी पक्ष सोडणार नाही. हे मी अनेकवेळा सांगितलं आहे. पक्ष विस्तारासाठी मी चाळीस वर्ष योगदान दिलं आहे. त्यामुळे मी पक्ष कसा सोडेल? असा सवाल करतानाच मला निर्णय प्रक्रियेपासून दूर ठेवलं जात आहे. कोअर कमिटीतूनही काढून टाकण्यात आलं आहे. पक्षातील काही नेते मला टार्गेट करत आहेत. माझ्यावर अन्याय, अत्याचार होत राहिल्यास मला वेगळा निर्णय घ्यावाच लागेल. मी काही देव नाही. पण निर्णय घेताना पक्षाला सांगूनच निर्णय घेईल, असं एकनाथ खडसे यांनी सांगितलं. ओबीसी नेतृत्वाच्या वक्तव्यावरून घुमजाव यावेळी एकनाथ खडसे यांनी ओबीसी नेतृत्वावर अन्याय झाला या त्यांच्या विधानावरून घुमजाव केलं. ओबीसी नेतृत्वावर अन्याय झाला असं मी कधी म्हटलं नव्हतं. ओबीसी आणि बहुजन समाजातील नेत्यांवर अन्याय होतोय, अशी कार्यकर्त्यांची भावना असल्याचं मी म्हटलं होतं. कार्यकर्त्यांची ही भावना आजही असून त्याकडे आज पक्ष कार्यकर्त्यांनी वरिष्ठ नेत्यांचं लक्ष वेधलं आहे, असं सांगतानाच ओबीसी नेतृत्वामुळेच पक्ष मोठा झाला आहे. पक्षाचा चेहरा-मोहरा बदलला आहे. जसा ओबीसी नेतृत्वामुळे पक्ष मोठा झाला तसंच पक्षामुळे ओबीसी नेतेही मोठे झाले, असं खडसे म्हणाले. व्हॉट्सअॅप, फेसबुकवरील पुरावे रोहिणी खडसे यांना पक्षातील नेत्यांच्या कारस्थानामुळेच पराभवाला सामोरे जावे लागल्याचा पुनरुच्चार खडसे यांनी केला. आज चंद्रकांत पाटील यांच्याकडे फेसबुक आणि व्हॉट्सअॅपवरील सर्व पुरावे दिले आहेत. हे सर्व पुरावे पाहून पाटीलही समाधानी झाले आहेत. आता त्यांनी हे कागदोपत्री पुरावे पाहून पक्षविरोधी कारवाई करणाऱ्यांवर शिस्तभंगाची किंवा अन्य कारवाई करावी, अशी मागणी खडसे यांनी केली. दरम्यान, खडसे आणि पाटील यांच्यात बंददाराआड सुमारे तासभर चर्चा झाली.

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/2Pmo53F
via IFTTT