पत्नीचा खून करून पती पोलीस ठाण्यात हजर

 पत्नीचा खून करून पती पोलीस ठाण्यात हजर झाल्याची घटना चिंचवडमध्ये शुक्रवारी (६ डिसेंबर) सकाळी घडली आहे. हसनसाहब दस्तगिरसाहब नदाफ (वय ४१, रा. दगडोबा चौक, चिंचवड. मूळ रा. अजनानपूर, जि. गुलबर्गा, कर्नाटक) असे आरोपी पतीचे नाव आहे. बानू हसनसाहब नदाफ (वय ३५) असे हत्या झालेल्या पत्नीचे नाव आहे. पोलिसांनी दिलेल्या माहितीनुसार, चिंचवड येथील दगडोबा चौकात नदाफ कुटुंब मागील दहा महिन्यांपासून राहत आहे. हसनसाहब हा टेलरिंगचे काम करतो. हसनसाहब याचा पहिला विवाह नसरीन यांच्याशी झाला. नसरीन यांचा मृत्यू झाल्यानंतर २०११ साली हसनसाहब याने मयत बानू यांच्याशी दुसरा विवाह केला होता. त्यांना सुमय्या (१९), अनिसा (वय १७), सफिया (वय १५) अशी तीन मुले आहेत. हसनसाहब याने बानू यांचा खून केल्याचा प्रकार शुक्रवारी सकाळी उघडकीस आला. खुनाचे कारण अद्याप समजू शकले नाही. त्याने खून करून ही माहिती स्वतः पोलीस ठाण्यात येऊन दिली. चिंचवड पोलिस तपास करीत आहेत.