मुंबईत ८२ वर्षीय आजीची करोनावर मात

मुंबई: करोनापासून ज्येष्ठ नागरिकांना सर्वाधिक धोका असला तरी अनेक वृद्ध इच्छाशक्तीच्या बळावर त्यावर मात करत आहेत. मुंबईतील एका ८२ वर्षीय आजीनंही करोनावर मात केली आहे. तिला आता डिस्चार्ज देण्यात आला आहे. मुंबईच्या पश्चिम उपनगरात राहणाऱ्या ही महिला काही दिवसांपूर्वी गुजरातहून मुंबईतील घरी परतली होती. खबरदारी म्हणून तिच्या कुटुंबीयांनी तिची वैद्यकीय चाचणी केली. त्यात ती करोना पॉझिटिव्ह असल्याचं समोर आलं. त्यानंतर तिला अंधेरी येथील कोकिलाबेन रुग्णालयातील आयसोलेशन कक्षात ठेवण्यात आलं होतं. तिथं सात दिवस तिच्यावर उपचार सुरू होते. उपचारानंतर ती करोनामुक्त झाली आहे. वृद्ध महिलेच्या मुलानं याबाबत माहिती दिली. 'करोनाचा अहवाल पॉझिटिव्ह आला असला तरी तिच्यामध्ये आजाराची लक्षणं तीव्र नव्हती. मात्र, ती घरी येईपर्यंत आम्ही प्रचंड अस्वस्थ होतो. आता तिची प्रकृती उत्तम आहे,' असं तो म्हणाला. करोनावर मात करणारी राज्यातील ती सर्वाधिक वृद्ध व्यक्ती ठरली आहे. वैद्यकीय शिक्षण विभागानं बनविलेल्या अहवालानुसार, ८१ ते ९० या वयोगटातील सुमारे १२ लोकांना करोनाची लागण झाली आहे. तर, नव्वदीच्या पुढील केवळ एक व्यक्ती पॉझिटिव्ह आढळला आहे. केरळमधील ९३ वर्षीय आजोबा व ८८ वर्षीय आजी हे करोनावर मात करणारं देशातील सर्वात वयस्कर जोडपं ठरलं आहे. तर, इटलीमध्ये दहा हजारांहून अधिक लोकांचे बळी घेणाऱ्या 'करोना'ला तेथील एका १०१ वर्षीय वृद्धानं चकवा दिला आहे.