💁‍♂️ अनधिकृत प्रवास केल्याप्रकरणी २० जणांवर गुन्हा.

लातूर बातम्या । Latur News

मुंबईहून निलंगा तालुक्यातील कोराळी येथे आलेल्या सहा जणांना कोरोना विषाणूची लागण झाल्याचे स्पष्ट होताच त्यांच्या सोबत प्रवास केलेल्या १३ जणांना प्रशासनाने ताब्यात घेऊन मुंबईहून अनधिकृत प्रवास करून जिल्हाबंदी कायद्याचे उल्लंघन केल्याप्रकरणी कोरोना बाधित ६ जणांसह एकूण २० जणांवर गुन्हे दाखल केल्याची माहिती उपविभागीय अधिकारी विकास माने यांनी दिली.

मुंबई ठाणे येथून निलंगा तालुक्यातील कोराळी येथे दाखल झालेल्या सात जणांना प्रशासनाने ताब्यात घेतले. त्यापैकी सहाजण कोरोना पॉझिटिव्ह निघाल्याचे समोर आले. प्रशासनाने तात्काळ कासारशिरसी व कोराळी गाव परिसरात लॉकडाऊन करुन ते सातजण कोराळी येथे कसे पोहोचले. त्यांच्या सोबत आणखी कोण होते. याचा शोध घेतला असता ते एका खाजगी गाडीने आल्याचे समोर आले.

त्या गाडीत आणखी निलंगा तालुक्यातील अनसरवाडा, लांबोटा व देवणी तालुक्यातल्या एका गावातील असे १३ जण प्रवास केल्याचे समजताच प्रशासनाने तात्काळ त्यांना ताब्यात घेऊन शासकीय विश्रामगृहातील क्वारंटाईन सेंटरमध्ये दाखल केले. त्यांच्या परिवारातील नागरिकांना होम क्वारंटाईनमध्ये राहण्याच्या सूचना दिल्या. ते सर्व २० जण विनापरवाना जिल्ह्यात दाखल झाल्याने त्यांच्यावर जिल्हाबंदी कायद्याचे उल्लंघन केल्याप्रकरणी गुन्हा दाखल करण्यात आल्याची माहिती उपविभागीय अधिकारी विकास माने यांनी दिली.