मुंबई : अचानकपणे सरकार स्थापन केलेल्या भाजपला कोंडीत पकडण्यासाठी राष्ट्रवादीचा प्लॅन ठरला आहे. पक्षाचे अध्यक्ष शरद पवार यांच्या नेतृत्त्वात राष्ट्रवादीने बोलावलेल्या बैठकीसाठी ५४ पैकी ४९ आमदारांची उपस्थिती असल्याची माहिती प्रवक्ते नवाब मलिक यांनी दिली. विधानसभा अध्यक्षाच्या निवडीत भाजपचा पराभव करण्याचं उद्दीष्ट राष्ट्रवादीने ठेवलं आहे. अस्थिरतेच्या काळात विधानसभा अध्यक्षपद सर्वात महत्त्वाचं मानलं जातं. त्यामुळे भाजपला या पदावर विजय मिळवता न आल्यास पवारांची खेळी यशस्वी होऊ शकते.
काय आहे राष्ट्रवादीचा बी प्लॅन? ‘राष्ट्रवादीच्या सर्व आमदारांची बैठक झाली. बैठकीला ५४ पैकी पाच ते सहा आमदार उपस्थित नव्हते. सर्व आमदारांनी प्रदेशाध्यक्ष जयंत पाटील यांना सर्वाधिकार दिले आहेत. अजित पवार यांच्याविरोधात ठराव मंजूर करण्यात आला. आता विधानसभा अध्यक्षाच्या निवडीत भाजपला हरवण्याचं ध्येय आहे,’ अशी माहिती नवाब मलिक यांनी दिली. विधानसभा अध्यक्षाला महत्त्व कशामुळे ? बहुमत सिद्ध करण्यासाठी राज्यपाल भगतसिंह कोश्यारी यांनी भाजपला ३० तारखेपर्यंतची मुदत दिली आहे. अधिवेशन बोलावल्यानंतर हंगामी विधानसभा अध्यक्ष हरीभाऊ बागडे यांची भूमिका महत्त्वाची असेल. कारण, राष्ट्रवादीने नवीन गटनेता निवडला तरीही त्याला मान्यता देण्याचे अधिकार हरीभाऊ बागडे यांच्याकडे आहेत. नवीन सरकार आलं तरीही नव्या विधानसभा अध्यक्षांची निवड केली जाईपर्यंत अगोदरच्याच विधानसभेच्या अध्यक्षांकडे अधिकार असतात. बहुमत सिद्ध करण्यापूर्वी अधिवेशन बोलावलं जाईल आणि हंगामी विधानसभा अध्यक्षच सर्व आमदारांना शपथ देतील. यावेळी पूर्णवेळ अध्यक्षांची निवड करण्याची प्रक्रिया करता येईल. विधानसभा अध्यक्षपदाच्या निवडणुकीत काँग्रेस, शिवसेना आणि राष्ट्रवादीलाही उमेदवार देण्याचा अधिकार आहे. त्यामुळे या तीन पक्षांनी आपल्या संख्याबळाच्या आधारावर विधानसभा अध्यक्षपद जिंकल्यास भाजपची सर्वात मोठी कोंडी होऊ शकते. कोणत्या पक्षाकडे किती सदस्य ? महाराष्ट्र विधानसभेची सदस्यसंख्या २८८ आहे. भाजप १०५ जागांसह सर्वात मोठा पक्ष ठरला होता. त्याखालोखाल शिवसेना ५६, राष्ट्रवादी ५४ आणि काँग्रेसने ४४ जागा जिंकल्या. तर छोटे पक्ष आणि अपक्ष मिळून २९ सदस्य आहेत. अपक्षांसह संख्याबळ ११९ पर्यंत जात असल्याचा भाजपचा दावा आहे. तर शिवसेनेलाही काही अपक्षांनी यापूर्वीच पाठिंबा जाहीर केला होता. त्यामुळे बहुमत सिद्ध करताना सभागृहात अजित पवार काय कमाल करतात त्यावर सर्व समीकरणे अवलंबून असतील.
from Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times https://ift.tt/2qGDyDn
via IFTTT
![1000+ Whatsapp Group Links to Join – 2019 Best [*Active*] Chat Groups](https://blogger.googleusercontent.com/img/b/R29vZ2xl/AVvXsEhmd2gKx90a1wmpLG_PAmIz_7nywmLPWnelg-F82IiABjs-eix2H_LBBoNHIn38uAXnCUXT-RkMysHZc85ObMWuNbLpgnPilPcn9fxY6vrfuWlx2GRjHqHOB8H9KAzSlPhR219pGaOWzEI/w100/v.jpg)
