उद्धव ठाकरे सहा तासानंतर 'ललित'मधून बाहेर

मुंबई: गेल्या सहा तासांपासून ललित हॉटेलमध्ये शिवसेनेच्या आमदारांशी चर्चा करण्यात आल्यानंतर पक्षप्रमुख आणि आदित्य ठाकरे हे मातोश्रीकडे रवाना झाले आहेत. भाजपकडून या आमदारांना फोडण्याचे प्रयत्न होण्याची शक्यता असल्याने या आमदारांचा मुक्काम हॉटेल ललितमधून दुसऱ्या हॉटेलमध्ये हलविण्यात येणार आहे. मात्र त्यांना नेमकं कोणत्या हॉटेलमध्ये ठेवण्यात येणार आहे, याची गुप्तता पाळण्यात आली आहे. शिवसेना पक्षप्रमुख उद्धव ठाकरे आणि युवासेना प्रमुख आदित्य ठाकरे हे दुपारी ४च्या सुमारास हॉटेल ललितमध्ये आले होते. यावेळी त्यांच्यासोबत शिवसेनेचे नेते आणि युवा सेनेचे पदाधिकारीही होते. ललित हॉटेलच्या सातव्या मजल्यावर उद्धव ठाकरे यांनी या आमदारांशी संवाद साधला. राष्ट्रवादीचे नेते अजित पवार यांनी भाजपला साथ दिली असली तरी राष्ट्रवादीचे अध्यक्ष शरद पवार हे आपल्याच सोबत आहेत. त्यामुळे चिंता करू नका, असा आमदारांना धीर देण्याचा प्रयत्नही उद्धव ठाकरे यांनी केला. काँग्रेस-राष्ट्रवादी आपल्यासोबत खंबीरपणे उभी आहे. तसेच राष्ट्रीय स्वयंसेवक संघाचे नेते आपल्या संपर्कात असल्याचंही त्यांनी सांगितलं. तसेच उद्या सर्वोच्च न्यायालयात महाराष्ट्राच्या सत्तापेचावर सुनावणी होणार आहे. त्यामुळे कोर्टाच्या निकालानंतर काय रणनीती आखायची याचीही चर्चा करण्यात आली. निकाल बाजूने लागल्यानंतर आणि विरोधात गेल्यानंतर काय करायचे? यावरही या बैठकीत चर्चा झाल्याचं सूत्रांनी सांगितलं. तसेच उद्या होणाऱ्या सुनावणीसाठी शिवसेनेकडून माजी उद्योगमंत्री सुभाष देसाई, खासदार अनिल देसाई तसेच अॅड. अनिल परब आज दिल्लीला रवाना झाल्याचंही या आमदारांना सांगण्यात आल्याचं सांगण्यात आलं.

प्रतिज्ञापत्रावर सह्या? दरम्यान, अजित पवारांना फोडण्यात भाजपला यश आल्यानंतर शिवसेनेचे आमदारही फोडले जाऊ शकतात, या भीतीने एकही आमदार फुटू नये म्हणून प्रतिज्ञापत्रावर आमदारांच्या सह्या घेण्यात आल्याचं सांगण्यात येतं. सर्व आमदारांनी प्रतिज्ञापत्रावर सह्या केल्याची खात्री पटल्यानंतरच उद्धव ठाकरे आणि आदित्य ठाकरे रात्री पावणे अकराच्या सुमारास मातोश्रीकडे रवाना झाल्याचं सूत्रांनी सांगितलं. दरम्यान, या आमदारांचा मुक्काम हॉटेल ललितमधून इतरत्र हलविण्याचा निर्णय ही यावेळी घेण्यात आल्याचं सूत्रांनी सांगितलं. मलिकांची डिनर डिप्लोमसी दरम्यान, उद्धव ठाकरे हॉटेल ललितमधून उद्धव ठाकरे निघाल्यानंतर या हॉटेलमध्ये राष्ट्रवादीचे प्रवक्ते नवाब मलिक आणि शिवसेनेचे विधीमंडळ गटनेते एकनाथ शिंदे पोहोचले. त्यानंतर या दोघांनीही आमदारांशी जेवण करता करता चर्चा केली. उद्याची कोर्टाची सुनावणी, काँग्रेस-राष्ट्रवादीची रणनीती आणि भाजपकडून आखले जाणारे संभाव्य डावपेच या मुद्द्यांवर यावेळी चर्चा झाल्याचं सांगण्यात येतं.

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/2XNGN8f
via IFTTT