अजित पवार संभ्रमात?; 'घरवापसी'ची शक्यता

मुंबई: राष्ट्रवादी काँग्रेसच्या विरोधात बंड करून भाजपला जाऊन मिळालेले व उपमुख्यमंत्रिपदाची शपथ घेणारे राष्ट्रवादीचे नेते हे द्विधा मनस्थितीत आहेत. राष्ट्रवादीतील नेत्यांकडून होत असलेल्या सततच्या मनधरणीमुळं ते पुन्हा वेगळा विचार करत असल्याचं बोललं जातं. सर्वोच्च न्यायालयाच्या निकालानंतर अजितदादांनी मुख्यमंत्री देवेंद्र फडणवीस यांची भेट घेतल्यानं त्यांच्या 'घरवापसी'च्या चर्चेला जोर आला आहे. शिवसेना, काँग्रेस व राष्ट्रवादी आघाडीच्या सरकारला विरोध असलेल्या अजित पवार यांनी अचानक भाजपशी हातमिळवणी केली. राष्ट्रवादीच्या आमदारांच्या सह्याचं पत्र गटनेते या नात्यानं दाखवून त्यांनी भाजपला पाठिंबा जाहीर केला. त्या आधारे राज्यपालांनी भाजप-राष्ट्रवादी (अजितदादा गट)चा सत्तास्थापनेचा दावा करून त्यांचा शपथविधीही घडवून आणला. त्यामुळं राज्याच्या राजकारणात वादळ निर्माण झाले होते. मात्र, अजित पवारांच्या निर्णयाशी संबंध नसल्याचं राष्ट्रवादीनं जाहीर केलं. तसंच, अजित पवारांची गटनेते पदावरून हकालपट्टी केली. शिवाय, तिन्ही पक्षांनी नव्या सरकारच्या शपथविधीला सर्वोच्च न्यायालयात आव्हान दिलं. एकीकडं हे सगळं सुरू असतानाच राष्ट्रवादीकडून अजित पवारांची मनधरणी करण्याचे प्रयत्न सुरूच होते. सलग दोन दिवस राष्ट्रवादीचे ज्येष्ठ नेते अजित पवारांच्या भेटी घेऊन त्यांना परोपरीनं समजावत होते. राजीनामा द्या आणि परत या, अशी विनंती या नेत्यांनी केली होती. पवार कुटुंबीयांकडूनही भावनिक आवाहन केलं जात होतं. आज सर्वोच्च न्यायालयाचा निकाल आल्यानंतरही अजित पवारांना पुन्हा आणण्याचे प्रयत्न सुरूच आहेत. त्यामुळं अजित पवार दबावाखाली असल्याचं बोललं जातं. नव्या सरकारची उद्या अग्निपरीक्षा अजित पवारांच्या पाठिंब्यानं सरकार स्थापन करणाऱ्या देवेंद्र फडणवीस यांना उद्या विश्वास ठरावाला सामोरे जाण्याचे आदेश सर्वोच्च न्यायालयानं दिले आहेत. विश्वास ठरावावरील मतदान गुप्त पद्धतीनं न करता खुल्या पद्धतीनं व्हावं. तसंच, मतदानाचं टीव्हीवर थेट प्रक्षेपण व्हावं, असंही न्यायालयानं स्पष्ट केलं आहे. विधानसभेतील सध्याचं पक्षीय बलाबल भाजप- १०५ शिवसेना - ५६ राष्ट्रवादी काँग्रेस- ५४ काँग्रेस- ४४ बहुजन विकास आघाडी- ३ एमआयएम- २ समाजवादी पार्टी- २ प्रहार जनशक्ती पार्टी- २ माकप- १ जनसुराज्य शक्ती- १ क्रांतिकारी शेतकरी पार्टी- १ महाराष्ट्र नवनिर्माण सेना- १ राष्ट्रीय समाज पक्ष- १ स्वाभिमानी पक्ष- १ शेकाप - १ अपक्ष- १३ एकूण जागा- २८८

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/2DhPmi9
via IFTTT