लग्नाचे आमीष; १६ वर्षांच्या मुलीवर अत्याचार

औरंगाबाद: शहरातील १६ वर्षांच्या मुलीला लग्नाचे आमीष दाखवून तिला पळवून नेऊन तिच्यावर अत्याचार केल्याप्रकरणी एकाला अटक करण्यात आली. दिनेश दिपक खरात असे आरोपीचे नाव असून शनिवारपर्यंत (७ डिसेंबर) पोलिस कोठडीत ठेवण्याचे आदेश विशेष न्यायाधीश ए. एस. खडसे यांनी दिले. मंगळवारी आरोपीला अटक करण्यात आली होती. या प्रकरणी पीडितेच्या सावत्र आईने फिर्याद दिली होती. फिर्यादीनुसार, १६ नोव्हेंबर २०१९ रोजी दुपारी बाराच्या सुमारास संबंधित मुलगी घरात टीव्ही पाहात होती व तिची आई (फिर्यादी) घरामध्ये काम करत होती. दहा मिनिटानंतर मुलगी घरात नसल्याचे फिर्यादीच्या लक्षात आले. शेजारी तसेच नातेवाईकांकडे शोध घेऊनही ती सापडली नाही. सिडको एमआयडीसी पोलीस ठाण्यात हरवल्याची तक्रार दाखल झाली. त्यानंतर, १९ नोव्हेंबर २०१९ रोजी पीडित मुलीने आपल्या आईसोबत पोलीस ठाण्यात येऊन जबाब दिला. तिच्या जबाबानुसार, तिची आरोपी दिनेश दिपक खरात (२३) याच्याशी वर्षभरापूर्वी ओळख झाली होती. आरोपीचा तिच्याशी फोनवर वारंवार संवाद सुरू होता. त्यादरम्यान आरोपीकडून पीडितेला लग्नाचे आमीष दाखवण्यात आले. त्यातूनच त्याने १६ नोव्हेंबर रोजी मुलीला हर्सूल टी पॉईंट येथे बोलावले होते. तिथे मुलगी पोहोचताच त्याने तिला एका पडक्या घरात नेऊन तिच्यावर बलात्कार केला. त्यानंतर आरोपीला त्याचा मामा भेटला व त्याने दोघांना कन्नडला नेले. त्यानंतर १८ नोव्हेंबर रोजी आरोपीने मुलीला सका‌ळी साडेआठच्या सुमारास बाबा पेट्रोल पंपाजवळ सोडले असल्याचा जबाब पीडित मुलीने दिला. या प्रकरणी अधिक तपास सुरू आहे.

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/2rQuSuD
via IFTTT