पीएमसी बँक घोटाळा: आणखी तिघांना अटक

मुंबई: पंजाब अँड महाराष्ट्र सहकारी बँकेच्या (पीएमसी) ४ हजार ३३५ कोटींच्या गैरव्यवहार प्रकरणी मुंबई पोलिसांच्या आर्थिक गुन्हे शाखेच्या पथकाने मंगळवारी आणखी तिघांना अटक केली. तत्कालीन संचालक जगदीश मुखी, संचालक आणि कर्ज व आगाऊ रक्कम समिती सदस्य मुक्ती बावीसी, संचालक आणि रिकव्हरी समिती सदस्या तृप्ती बने, अशी अटक केलेल्या तिघांची नावे आहेत. या तिघांच्या अटकेमुळे या घोटाळ्यातील आरोपींची संख्या १२ वर पोहोचली आहे. 'पीएमसी'च्या गैरव्यवहार प्रकरणी आर्थिक गुन्हे शाखेने गुन्हा नोंदवल्यानंतर घोटाळ्याची व्याप्ती पाहून तपासासाठी विशेष पथक नेमण्यात आले आहे. या पथकाने प्रथम 'एचडीआयएल'चे कार्यकारी अध्यक्ष राकेश वाधवान आणि व्यवस्थापकीय संचालक सारंग वाधवान यांना अटक केली. त्यानंतर 'पीएमसी'चे निलंबित व्यवस्थापकीय संचालक जॉय थॉमस, अध्यक्ष वारियामसिंग कर्तारसिंग आणि एस. सुरजितसिंग अरोरा यांना पकडण्यात आले. त्यानंतर भाजपचे माजी आमदार सरदार तारासिंग यांचा मुलगा व बँकेचे तत्कालीन संचालक रणजित सिंग यांनाही अटक करण्यात आली. यात आज आणखी तीन आरोपींची भर पडली असून आतापर्यंत या प्रकरणात एकूण १२ आरोपींना अटक करण्यात आली आहे. केंद्राचा ठेवीदारांना दिलासा केंद्रीय अर्थमंत्री निर्मला सीतारामन सोमवारी लोकसभेत बोलताना पीएमसी बँकेच्या खातेधारकांना आश्वस्त केलं होतं. सुमारे ७८ टक्के खातेधारकांना त्यांच्या खात्यात असलेली संपूर्ण ठेव काढण्यासाठी परवानगी देण्यात आलेली आहे. त्यात एकावेळी ५० हजार रुपयांपर्यंत रक्कम काढण्याची मर्यादा ठेवण्यात आलेली आहे. 'पीएमसी बँकेचं प्रकरण अत्यंत संवेदनशील आहे. रिझर्व्ह बँकेशी सकारात्मक अशा समन्वयातून याबाबतीत ठोस पावले सरकार उचलत आहे. ठेवीदारांना केंद्रस्थानी ठेवून त्यांची चिंता दूर करण्याच्या दृष्टीने प्रयत्न केले जात आहेत, असे सीतारामन म्हणाल्या होत्या. सहा खातेधारकांचा मृत्यू पीएमसी बँकेतील घोटाळा उघड झाल्यानंतर रिझर्व्ह बँकेने या बँकेवर निर्बंध लादल्याने या बँकेचे लाखो ग्राहक हवालदील झाले आहेत. आपली आयुष्याची कमाई बुडाल्याच्या भीतीने अनेक खातेधारक चिंतेत पडले आहेत. याच तणावातून आतापर्यंत बँकेच्या सहा खातेधारकांचा मृत्यू झाला आहे. राजनीत यांचे वडील सरदार तारासिंग मुलुंडचे माजी आमदार आहेत. याच भागात बँकेचे मोठ्या प्रमाणात ग्राहक आहेत.

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/2Y9qC5s
via IFTTT